لمبی عمر کےلیے ہر سال کروڑوں روپے خرچ کرنے والا ارب پتی لاعلاج بیماری میں مبتلا

اینٹی ایجنگ اور لمبی عمر کی تحقیق کے حوالے سے دنیا بھر میں مشہور امریکی ٹیک انٹرپرینیور برائن جانسن نے انکشاف کیا ہے کہ وہ ‘آٹو امیون گیسٹرائٹس’ نامی ایک نایاب اور فی الحال ناقابلِ علاج بیماری میں مبتلا ہو گئے ہیں۔ سوشل میڈیا پلیٹ فارم ایکس (X) پر جاری ایک تفصیلی پوسٹ میں انہوں نے بتایا کہ یہ بیماری ان کے معدے کو متاثر کر رہی ہے، جس کے باعث ان کی صحت پر کڑی نظر رکھی جا رہی ہے۔ انہوں نے انکشاف کیا کہ اس بیماری کے علاج کے لیے مصنوعی ذہانت (AI) کی مدد سے تیار کردہ تجرباتی اینٹی باڈیز کا جائزہ لیا جا رہا ہے، تاہم یہ طریقۂ علاج ابھی ابتدائی مراحل میں ہے۔ برائن جانسن کی اس بیماری کے سامنے آنے کے بعد طبی حلقوں میں ان کے متنازع اینٹی ایجنگ تجربات، جیسے خون کے پلازما کی منتقلی اور جین تھراپی پر ایک نئی بحث چھڑ گئی ہے۔ ماہرین کے مطابق آٹو امیون گیسٹرائٹس میں جسم کا اپنا مدافعتی نظام معدے کی اندرونی تہہ پر حملہ کر دیتا ہے، جس سے جسم میں وٹامن بی 12 جذب کرنے کی صلاحیت ختم ہو جاتی ہے اور خون کی کمی سمیت کئی پیچیدگیاں پیدا ہو سکتی ہیں۔ اگرچہ اس مرض کا مستقل علاج موجود نہیں، تاہم وٹامن بی 12 کے انجیکشنز اور مناسب طبی نگرانی کے ذریعے اس کی علامات کو قابو کیا جا سکتا ہے۔