آبنائے ہرمز مکمل بند، جہازرانوں کو اگلے نوٹس تک سفر نہ کرنے کی ہدایت

ایرانی پاسدارانِ انقلاب نے آبنائے ہرمز (Strait of Hormuz) کو ہر قسم کی بحری آمدورفت کے لیے مکمل طور پر بند کرنے کا اعلان کر دیا ہے، جس کے بعد ‘پرشین گلف اسٹریٹ اتھارٹی’ نے بھی عالمی جہاز رانوں کو باقاعدہ نوٹس جاری کرتے ہوئے اگلے احکامات تک اس بحری راستے پر سفر نہ کرنے کی ہدایت کی ہے۔ اتھارٹی کے ترجمان کے مطابق، خطے میں جاری فوجی کارروائیوں کے باعث یہ قدم اٹھایا گیا ہے اور امن و استحکام کی بحالی تک آبنائے ہرمز مکمل بند رہے گی۔ دوسری جانب، برطانوی میری ٹائم اتھارٹی نے علاقے میں سیکیورٹی خطرات کو سنگین قرار دیتے ہوئے بحری جہازوں کو احتیاط برتنے اور متبادل کے طور پر پہلے سے رابطہ کر کے جنوبی راستہ استعمال کرنے کا مشورہ دیا ہے۔ اس کے برعکس، امریکی سینٹرل کمانڈ (CENTCOM) نے ایرانی اعلان کو بلاجواز جارحیت اور دھمکی آمیز رویہ قرار دیتے ہوئے مسترد کر دیا ہے اور دعویٰ کیا ہے کہ ایران آبنائے ہرمز پر کوئی کنٹرول نہیں رکھتا اور یہ بین الاقوامی قوانین کی پاسداری کرنے والے جہازوں کے لیے معمول کے مطابق کھلی ہے۔