ایبولا وائرس کی نئی ویکسین کے انسانی آزمائشی مراحل شروع

آکسفورڈ یونیورسٹی نے ایبولا وائرس کی خطرناک ‘بُنڈی بُگیو’ قسم کے خلاف تیار کی گئی نئی ویکسین کے پہلے انسانی آزمائشی مرحلے (فیز 1 کلینیکل ٹرائل) کا باضابطہ آغاز کر دیا ہے۔ یہ مہلک وائرس اس وقت جمہوریہ کانگو اور یوگنڈا میں شدید تباہی مچا رہا ہے۔ یونیورسٹی کے آکسفورڈ ویکسین گروپ کے سائنس دان ابتدائی مرحلے میں برطانیہ کے 18 سے 55 سال کی عمر کے 50 صحت مند رضاکاروں پر “ChAdOx1 BDBV” نامی ویکسین کی حفاظت، افادیت اور مدافعتی ردِعمل کا تفصیلی جائزہ لیں گے۔ یہ ویکسین اسی جدید وائرل ویکٹر ٹیکنالوجی پر تیار کی گئی ہے جس پر مشہور آکسفورڈ/ایسٹرازینیکا کووڈ-19 ویکسین بنائی گئی تھی، جس کے باعث ہنگامی ضرورت پڑنے پر اس کی بڑے پیمانے پر تیاری محض چند ہفتوں میں ممکن ہے۔ ممکنہ ہنگامی صورتحال کے پیشِ نظر سیرم انسٹی ٹیوٹ آف انڈیا (SII) نے اس ویکسین کی 6 لاکھ 20 ہزار خوراکیں پہلے ہی ذخیرہ کر لی ہیں، جبکہ آکسفورڈ میں جاری آزمائشی مرحلے کے لیے مزید 4 ہزار تحقیقی خوراکیں بھی فراہم کر دی گئی ہیں۔