عمان کے ساحل کے قریب حملے کا شکار جہاز سے لاپتا بھارتی انجینئر کی لاش مل گئی

عمان کے ساحل کے قریب حملے کا نشانہ بننے والے قبرص کے پرچم بردار تجارتی جہاز “جی ایف ایس گلیکسی” سے لاپتا ہونے والے 30 سالہ بھارتی میرین انجینئر ہیرمب کرمارکر کی لاش برآمد کر لی گئی ہے۔ بھارتی شہر پونے سے تعلق رکھنے والے ہیرمب اتوار کے روز جہاز پر ہونے والے حملے کے بعد سے لاپتا تھے، جن کی تلاش کے لیے عمانی کوسٹ گارڈز نے ریسکیو آپریشن شروع کیا تھا۔ فارورڈ سی مینز یونین آف انڈیا کے عہدیدار منوج یادو کے مطابق، شپنگ کمپنی نے منگل کی شام لاش ملنے کی تصدیق کی ہے۔ واضح رہے کہ تاحال حملے کی نوعیت اور ذمہ داروں کے بارے میں تفصیلات سامنے نہیں آئی ہیں، تاہم متعلقہ حکام واقعے کی تحقیقات کر رہے ہیں۔ حالیہ دنوں میں خلیج عمان اور آبنائے ہرمز کے اطراف بڑھتی ہوئی کشیدگی نے عالمی بحری صنعت اور بین الاقوامی تجارت کے لیے شدید سیکیورٹی خدشات پیدا کر دیے ہیں۔