آئی سی سی نے ون ڈے اور ٹی 20 ورلڈ کپ کے نئے فارمیٹس کی منظوری دے دی

انٹرنیشنل کرکٹ کونسل (آئی سی سی) نے مقابلوں کو مزید سنسنی خیز بنانے کے لیے مینز ون ڈے اور ٹی ٹوئنٹی ورلڈ کپ کے فارمیٹس میں بڑی تبدیلیاں منظور کر لی ہیں۔ 14 ٹیموں کے ون ڈے ورلڈ کپ کے لیے تین مرحلوں پر مشتمل نیا نظام لایا گیا ہے، جس میں ابتدائی “سپر سیریز” کے بعد 6، 6 ٹیموں کے دو گروپس بنیں گے اور پھر ٹاپ ٹیمیں “سپر 7” مرحلے میں ایک دوسرے کے خلاف کھیلیں گی جہاں سے چار ٹیمیں سیمی فائنل میں جائیں گی۔ دوسری جانب، 20 ٹیموں کے ٹی ٹوئنٹی ورلڈ کپ میں سپر 8 کی جگہ “سپر 10” مرحلہ متعارف کرایا گیا ہے، جس کے تحت 5 گروپس کی ٹاپ دو، دو ٹیمیں آگے آئیں گی اور پہلی پوزیشن والی ٹیمیں براہِ راست سیمی فائنل جبکہ دوسری اور تیسری پوزیشن کی ٹیمیں ایلیمینیٹر میچز کھیلیں گی۔ اس کے علاوہ آئی سی سی نے ایسوسی ایٹ ممالک کے لیے 16 ٹیموں کے عالمی ٹی ٹوئنٹی ٹورنامنٹ اور 2028ء کے ٹی ٹوئنٹی ورلڈ کپ کے لیے نئے کوالیفکیشن نظام کی بھی اصولی منظوری دے دی ہے۔