آصفہ بھٹو سے انڈونیشین سفیر کی ملاقات، دوطرفہ تعلقات مزید مضبوط بنانے پر اتفاق

خاتونِ اول آصفہ بھٹو زرداری سے پاکستان میں انڈونیشیا کے سفیر چندرا وارسینانتو سوکوتجو نے ملاقات کی، جس میں دوطرفہ تعلقات، تجارت، سرمایہ کاری، زراعت، تعلیم، صحت اور ٹیکنالوجی کے شعبوں میں تعاون کو وسعت دینے پر تفصیلی تبادلہ خیال کیا گیا۔ آصفہ بھٹو زرداری نے انڈونیشیا کے سفیر کو پاکستان-انڈونیشیا سرمایہ کاری فورم کے کامیاب انعقاد پر مبارکباد دی اور بانی صدر سوکارنو اور شہید ذوالفقار علی بھٹو کے قریبی دوستانہ تعلقات کا ذکر کرتے ہوئے دونوں ممالک کے دیرینہ رشتوں کو سراہا۔ ملاقات کے دوران انہوں نے زور دیا کہ انڈونیشیا پاکستان کے، بالخصوص سندھ کے اعلیٰ معیار کے چاول کی اہم منڈی ہے، اور پام آئل سمیت دیگر زرعی اجناس، ویکسین کی تیاری، خاندانی منصوبہ بندی، پولیو کے خاتمے اور خواتین کی کاروباری سرگرمیوں میں تعاون بڑھانے کے وسیع امکانات موجود ہیں۔ انڈونیشیائی سفیر نے دوطرفہ تجارت اور ثقافتی تبادلوں کو مزید مضبوط بنانے کے عزم کا اعادہ کیا، جس پر خاتونِ اول نے یقین دلایا کہ پاک-انڈونیشیا دوستی مستقبل میں مزید گہری ہوگی۔