مینڈک کی آنت میں موجود بیکٹیریا مہلک کینسر کے علاج میں مددگار ثابت ہو سکتا ہے

ایک نئی اور انقلابی سائنسی تحقیق میں یہ انکشاف ہوا ہے کہ زیادہ تر ایمفیبیئنز (جل تھلیوں) کی آنتوں میں پایا جانے والا ایک خاص بیکٹیریا چوہوں میں بڑی آنت کے کینسر (کولوریکٹل کینسر) کو مکمل طور پر ختم کرنے کی صلاحیت رکھتا ہے۔ جاپان ایڈوانسڈ انسٹی ٹیوٹ آف سائنس اینڈ ٹیکنالوجی کے محققین نے جاپانی درختی مینڈکوں، فائر بیلی نیوٹ اور گھاس کی چھپکلیوں کے معدے سے بیکٹیریا کی 45 اقسام حاصل کیں، جن میں سے ‘ایونگیلا امیریکانا’ (Evangiella americana) نامی بیکٹیریا نے سب سے حیران کن نتائج دیے۔ سائنسی جریدے ‘گٹ مائیکروبز’ میں شائع ہونے والی اس تحقیق کے مطابق، جب اس بیکٹیریا کو کینسر زدہ چوہوں کی رگوں میں انجیکشن کے ذریعے داخل کیا گیا تو محض ایک خوراک سے رسولیاں 100 فیصد ختم ہو گئیں۔ ماہرین کا کہنا ہے کہ یہ بیکٹیریا نہ صرف براہِ راست کینسر کے خلیات پر حملہ کرتا ہے بلکہ جسم کے مدافعتی نظام (Immune System) کو بھی فعال کر دیتا ہے۔ اگر مستقبل میں انسانی آزمائشیں (Human Trials) بھی کامیاب رہیں تو یہ دریافت کینسر کے لاعلاج مریضوں کے لیے امید کی ایک نئی کرن ثابت ہوگی۔