پاکستان کی فارما صنعت میں 1 ارب ڈالر کی فوری سرمایہ کاری کا امکان

پاکستان کی فارماسیوٹیکل صنعت میں 1 ارب ڈالر کی ممکنہ فوری سرمایہ کاری کے سلسلے میں ایک اہم پیش رفت سامنے آئی ہے، جہاں کراچی میں 17 جولائی سے شیڈول پاک چین فارماسیوٹیکل کانفرنس کو اب وفاقی دارالحکومت اسلام آباد منتقل کرنے کا فیصلہ کیا گیا ہے۔ ذرائع کے مطابق، ملکی تاریخ میں پہلی مرتبہ منعقد ہونے والی اس بزنس ٹو بزنس (B2B) فارما کانفرنس کے لیے وفاقی وزارتِ صحت نے تیاریاں مکمل کر لی ہیں، جس میں چین کی 130 بڑی سرمایہ کار کمپنیوں اور تقریباً 150 پاکستانی فارما و سرمایہ کاری کمپنیوں کے سربراہان شرکت کریں گے۔ اس تاریخی کانفرنس میں میڈیکل ڈیوائسز، ویکسین، خام مال، سرجیکل آئٹمز کی مقامی سطح پر تیاری اور ٹیکنالوجی ٹرانسفر کے اہم معاہدے متوقع ہیں، جس سے چند سالوں میں پاکستان کی فارما مارکیٹ میں سرمایہ کاری کا حجم 5 ارب ڈالر تک پہنچ جائے گا۔ مزید برآں، چینی کمپنیوں کے اشتراک سے اسلام آباد، لاہور اور کراچی میں نئی ادویہ ساز فیکٹریاں قائم کی جائیں گی، جبکہ چینی روایتی و ہربل ادویہ سازی، کلینکل ٹرائل، ریسرچ اور فارماسیوٹیکل مشینری کی تیاری میں بھی معاونت فراہم کی جائے گی۔ کانفرنس کے باقاعدہ آغاز سے ایک روز قبل وفاقی وزیرِ صحت مصطفیٰ کمال پریس کانفرنس کے ذریعے اس کے خدوخال واضح کریں گے۔