عمرہ نظام میں بڑی اصلاحات، نئے رولز نافذ کر دیے گئے

وفاقی حکومت نے زائرین کے حقوق کے تحفظ، شفافیت اور فراڈ کے تدارک کے لیے ‘حج و عمرہ ایکٹ 2024’ کے تحت نئے عمرہ قواعد و ضوابط نافذ کر دیے ہیں۔ نئے رولز کے تحت عمرہ کے تمام انتظامات اب وزارتِ مذہبی امور کے دائرہ اختیار میں ہوں گے، جبکہ وفاقی کابینہ کی منظوری کے بعد ایک خصوصی “عمرہ پالیسی کمیٹی” بھی تشکیل دی جائے گی۔ حکومت نے واضح کیا ہے کہ صرف وزارت سے رجسٹرڈ اور تصدیق شدہ عمرہ کمپنیاں ہی زائرین کو خدمات فراہم کرنے کی مجاز ہوں گی، اور ان کمپنیوں کو سعودی ‘نسک’ (Nusuk) معاہدوں کی فوری تصدیق کرانے کی ہدایت کی گئی ہے۔ وزارتِ مذہبی امور مستند آپریٹرز کی فہرست اپنی ویب سائٹ پر جاری کرے گی؛ زائرین کو سختی سے ہدایت کی گئی ہے کہ وہ بکنگ صرف رجسٹرڈ کمپنیوں سے کریں اور تمام ادائیگیاں بینکنگ چینل کے ذریعے کر کے دستاویزات محفوظ رکھیں۔ وزارت نے خبردار کیا ہے کہ غیر رجسٹرڈ کمپنیوں سے لین دین کی صورت میں تمام تر ذمہ داری خود زائرین پر ہوگی اور ایسی کمپنیوں کے خلاف شکایات کا ازالہ نہیں کیا جائے گا۔