آئی ایم ایف نے پاکستان میں مہنگائی کی شرح میں اضافے کا خدشہ ظاہر کر دیا

بین الاقوامی مالیاتی فنڈ (آئی ایم ایف) نے رواں مالی سال 27-2026 کے دوران پاکستان میں مہنگائی کی شرح حکومتی ہدف اور گزشتہ مالی سال کے مقابلے میں زیادہ رہنے کا خدشہ ظاہر کیا ہے۔ آئی ایم ایف کی جانب سے جاری کردہ تازہ ترین کنٹری رپورٹ کے مطابق، رواں مالی سال میں پاکستان میں مہنگائی کی اوسط شرح 8.4 فیصد تک پہنچنے کا امکان ہے، تاہم ریلیف کی بات یہ ہے کہ آئندہ چار مالی سالوں کے دوران یہ شرح موجودہ سطح سے مزید کم رہے گی۔ رپورٹ میں یہ خوش آئند تخمینہ بھی لگایا گیا ہے کہ اگلے پانچ سال تک پاکستان میں اوسط مہنگائی سنگل ڈیجٹ (اکہرے ہندسے) میں برقرار رہے گی، جبکہ گزشتہ دو مالی سالوں کے دوران بھی اوسط مہنگائی سنگل ڈیجٹ میں ہی ریکارڈ کی گئی تھی۔ دوسری جانب، ایشیائی ترقیاتی بینک (ADB) نے بھی خبردار کیا ہے کہ توانائی کا بحران ایشیائی معیشتوں کو شدید متاثر کر رہا ہے، جس کی وجہ سے خطے میں مہنگائی کے دباؤ میں مزید اضافہ ہو سکتا ہے۔