بلوچستان میں سات روزہ انسداد پولیو مہم آج سے شروع

بلوچستان کے ہائی رسک علاقوں میں پولیو وائرس کے ماحولیاتی پھیلاؤ کے پیشِ نظر آج سے سات روزہ خصوصی انسدادِ پولیو مہم کا آغاز کیا جا رہا ہے۔ ایمرجنسی آپریشن سینٹر (EOC) کے مطابق، یہ مہم صوبے کی 142 ہائی رسک یونین کونسلز میں چلائی جائے گی، جس کے دوران 7 لاکھ 30 ہزار 670 بچوں کو پولیو سے بچاؤ کے قطرے اور حفاظتی ٹیکے لگانے کا ہدف مقرر کیا گیا ہے۔ کوآرڈینیٹر ای او سی انعام الحق نے تفصیلات بتاتے ہوئے کہا کہ اس خصوصی مہم کے دائرہ کار میں کوئٹہ، پشین، قلعہ عبداللہ، چمن اور برشور شامل ہیں، جہاں 2 ہزار 700 سے زائد پولیو ٹیمیں گھر گھر جا کر بچوں کو ویکسین پلائیں گی۔ حکام نے انکشاف کیا ہے کہ ہائی رسک علاقوں کے ماحول میں پولیو وائرس کی موجودگی کے شواہد ملے ہیں، اس لیے والدین سے پرزور اپیل کی گئی ہے کہ وہ اپنے بچوں کے محفوظ مستقبل کے لیے پولیو ٹیموں سے تعاون کریں اور ہر بچے کو لازمی ویکسین دلوائیں۔