آزاد کشمیر بحران؛ بلاول بھٹو کا جے کے جے اے اے سی کو خط، دھرنے معطل کرنے کی اپیل

پاکستان پیپلز پارٹی کے چیئرمین بلاول بھٹو زرداری نے جموں کشمیر جوائنٹ عوامی ایکشن کمیٹی (جے کے جے اے اے سی) کے خط کا جواب دیتے ہوئے آزاد کشمیر میں قیمتی جانوں کے ضیاع کو قومی المیہ قرار دیا ہے اور بحران کے حل کے لیے فریقین کی رضامندی سے ایک بااختیار “حقائق اور مفاہمت کمیشن” (Truth and Reconciliation Commission) قائم کرنے کی تجویز پیش کی ہے۔ اپنے مکتوب میں بلاول بھٹو زرداری نے واضح کیا کہ پرامن شہریوں کو حقوق کے مطالبے پر دہشت گرد یا پاکستان مخالف قرار دینا نامناسب ہے، اور اسلام آباد میں بیٹھے کسی بھی شخص کو کشمیریوں کی شناخت پر سوال اٹھانے کا کوئی حق نہیں ہے۔ انہوں نے تجویز دی کہ کمیشن کی تشکیل پر اتفاق ہوتے ہی عوامی ایکشن کمیٹی اپنا مجوزہ لانگ مارچ اور دھرنے معطل کرے، جبکہ انتظامیہ بھی تادیبی کارروائیوں سے گریز کرے۔ پی پی پی چیئرمین نے اس عزم کا اعادہ کیا کہ کشمیر کے ساتھ پاکستان کا رشتہ رضامندی، وقار اور باہمی احترام پر مبنی ہونا چاہیے، اور ان کی جماعت اس سیاسی بحران کو حل کرنے میں اپنا مکمل کردار ادا کرنے کے لیے تیار ہے۔