اپریل 2027 تک ڈبلیو ایچ او میچیورٹی لیول 3 حاصل کر لیں گے: مصطفیٰ کمال

وفاقی وزیرِ صحت مصطفیٰ کمال سے عالمی ادارۂ صحت (ڈبلیو ایچ او) کے پاکستان میں نمائندے نے ایک اہم ملاقات کی ہے، جس میں ڈریپ (DRAP) کے لیے ڈبلیو ایچ او میچیورٹی لیول 3 (ML-3) کی تصدیق حاصل کرنے کے عمل کا تفصیلی جائزہ لیا گیا۔ ملاقات کے دوران ڈبلیو ایچ او کے سربراہ نے وفاقی کابینہ کی جانب سے پاکستان کی پہلی قومی ویکسین پالیسی کی منظوری کو ایک تاریخی سنگِ میل قرار دیتے ہوئے صحت کے شعبے میں جاری اصلاحات کے لیے وفاقی وزیر کی قیادت کو سراہا۔ اس موقع پر وفاقی وزیرِ صحت مصطفیٰ کمال نے ڈبلیو ایچ او کی تکنیکی معاونت کا شکریہ ادا کرتے ہوئے اعلان کیا کہ پاکستان اپریل 2027 تک کامیابی سے میچیورٹی لیول 3 کا درجہ حاصل کر لے گا، جس سے ملکی دواساز صنعت کو عالمی سطح پر زبردست پذیرائی ملے گی اور پاکستان کے لیے دنیا کے تقریباً 160 ممالک کی فارماسیوٹیکل مارکیٹوں کے دروازے کھل جائیں گے۔ انہوں نے مزید بتایا کہ اس ہدف کی بروقت تکمیل اور وفاق و صوبوں کے درمیان مضبوط ہم آہنگی کے لیے آئندہ چند روز میں تمام صوبوں کے وزرائے اعلیٰ کا ایک اعلیٰ سطحی اجلاس بھی طلب کیا جا رہا ہے۔