ماہرین نے فالج کے مرض کا عندیہ دینے والی 3 عام نشانیاں بتا دیں

طبی ماہرین نے انسانی جسم میں ظاہر ہونے والی ایسی تین عام نشانیوں کی نشاندہی کی ہے جو فالج جیسے جان لیوا مرض کا قبل از وقت اشارہ دے سکتی ہیں۔ چین کی جیانگ یونیورسٹی اسکول آف میڈیسن میں کی گئی ایک جامع تحقیق کے مطابق، مسلز کے حجم میں کمی، ہاتھوں کی گرفت کا کمزور ہونا اور چلنے کی رفتار میں سست روی کسی بھی فرد میں فالج کے خطرے میں اضافے کا واضح عندیہ ہیں۔

تحقیق کے نتائج سے معلوم ہوا ہے کہ جن افراد کے مسلز کی مضبوطی گھٹ جاتی ہے، ان میں فالج کا مجموعی خطرہ 30 فیصد تک بڑھ جاتا ہے۔ اسی طرح، ہاتھ کی کمزور گرفت اس خطرے میں 7 فیصد اضافہ کرتی ہے، جبکہ چلنے کی سست رفتار سب سے زیادہ خطرناک ثابت ہوئی ہے، جس سے فالج کا خطرہ 64 فیصد تک بڑھ سکتا ہے۔ یہ مطالعہ 4 لاکھ 80 ہزار سے زائد افراد کے طویل مدتی ڈیٹا کی جانچ پڑتال کے بعد سامنے آیا ہے۔

ماہرین کا کہنا ہے کہ فالج کی دو اہم اقسام ہیں؛ ایک جس میں دماغی شریان پھٹ جاتی ہے (برین ہیمرج) اور دوسری جس میں خون کی فراہمی بلاک ہونے سے آکسیجن کی کمی واقع ہوتی ہے۔ چونکہ فالج کا فوری علاج نہ ہونے کی صورت میں موت یا مستقل معذوری کا خدشہ ہوتا ہے، اس لیے جسمانی طاقت اور نقل و حرکت میں آنے والی ان تبدیلیوں پر نظر رکھنا بچاؤ کے لیے انتہائی ضروری ہے۔