مؤقف پر قائم ہوں، کشمیری مہاجرین کی نشستیں ختم نہیں ہونے دیں گے: خواجہ آصف

وفاقی وزیرِ دفاع خواجہ محمد آصف نے واضح کیا ہے کہ وہ اپنے مؤقف پر قائم ہیں اور کشمیری مہاجرین کی مخصوص نشستیں کسی صورت ختم نہیں ہونے دیں گے۔ اپنے آبائی شہر سیالکوٹ میں ایک عوامی جلسے سے خطاب کرتے ہوئے انہوں نے کہا کہ مہاجرین نے پاکستان پہنچنے کے لیے جان، مال اور خاندانوں کی بے مثال قربانیاں دیں اور پورا ملک ان کا مقروض ہے۔ انہوں نے کہا کہ گھروں میں بیٹھ کر آزادی حاصل کرنے والے آج ان قربانیوں کو بھول کر نشستیں ختم کرنے کی باتیں کر رہے ہیں، لیکن پورا پاکستان ان کے ساتھ کھڑا ہے۔ خواجہ آصف نے مزید کہا کہ وہ ہمیشہ سیاسی نتائج کی پروا کیے بغیر حق بات کرتے ہیں، نیز انہوں نے دعویٰ کیا کہ آزاد کشمیر کے آنے والے انتخابات میں مسلم لیگ (ن) شاندار کامیابی حاصل کرے گی۔