دریائے سندھ میں پانی کی آمد میں اضافہ، سیلاب، کئی دیہات زیر آب، زمینی رابطہ منقطع

ملک بھر میں حالیہ بارشوں کے بعد دریاؤں اور ندی نالوں میں پانی کی سطح میں خطرناک حد تک اضافہ ہو گیا ہے، جس سے مختلف علاقوں میں سیلابی صورتحال پیدا ہو گئی ہے۔ رحیم یار خان میں دریائے سندھ اور گڈو بیراج کے مقام پر درمیانے درجے کا سیلاب آ چکا ہے، جس کے باعث لیاقت پور اور کچے کے 30 سے زائد دیہات زیرِ آب آ گئے ہیں اور متاثرہ علاقوں کا زمینی رابطہ منقطع ہو گیا ہے؛ متاثرین اپنی مدد آپ کے تحت محفوظ مقامات پر نقل مکانی کر رہے ہیں۔ دوسری جانب فیروزوالہ میں نالہ بھیڑ میں شگاف پڑنے سے پٹھان کالونی اور رانا ٹاؤن سمیت کئی گاؤں زیرِ آب آ گئے، جہاں سے خواتین اور بچوں کو محفوظ مقامات پر منتقل کر دیا گیا ہے۔ صورتحال کی سنگینی کو مدِنظر رکھتے ہوئے این ای او سی (NEOC) نے 2 اگست تک دریاؤں کے بہاؤ میں مزید اضافے کا الرٹ جاری کر دیا ہے۔