آزاد کشمیر انتخابات کا دوسرا مرحلہ: انتخابی مہم کا وقت ختم، دنگل کل سجے گا

آزاد کشمیر میں قانون ساز اسمبلی کے انتخابات کے دوسرے مرحلے کے لیے چلائی جانے والی گرم جوش انتخابی مہم کا وقت ختم ہو گیا ہے اور پولنگ کا انتخابی دنگل کل 2 اگست کو سجے گا۔ دوسرے مرحلے کے تحت مظفر آباد ڈویژن کی 9 اور کشمیری مہاجرین کی 12 نشستوں سمیت کل 21 حلقوں میں ووٹنگ ہوگی، جہاں پاکستان مسلم لیگ (ن) اور پاکستان پیپلز پارٹی کے درمیان کانٹے کا مقابلہ متوقع ہے۔ ان انتخابات میں 12 لاکھ سے زائد ووٹرز اپنا حقِ رائے دہی استعمال کریں گے، جبکہ مظفر آباد ڈویژن میں 208 اور مہاجرین کی نشستوں پر 143 امیدوار آمنے سامنے ہیں۔ الیکشن کمیشن کے مطابق پرامن پولنگ کو یقینی بنانے کے لیے سیکیورٹی کے سخت انتظامات کیے گئے ہیں، جس کے تحت انتہائی حساس پولنگ اسٹیشنز پر 8، حساس پر 6 اور نارمل پولنگ اسٹیشنز پر 4 پولیس اہلکار اپنے فرائض انجام دیں گے۔