شہدا پر سیاست نا قابل قبول، سیاست کو دہشتگردی سے نہ جوڑا جائے: سرفراز بگٹی

وزیراعلیٰ بلوچستان میر سرفراز بگٹی نے پولیس اور انسدادِ دہشت گردی فورس (CTD) کے بیسک ٹریننگ کورس کی پاسنگ آؤٹ پریڈ سے خطاب کرتے ہوئے کہا ہے کہ شہدا پر سیاست کسی صورت قبول نہیں کی جائے گی اور سیاست کو دہشت گردی سے نہ جوڑا جائے۔ انہوں نے کہا کہ معصوم لوگوں کو لاحاصل جنگ کی طرف دھکیلا گیا ہے، لیکن فورسز دہشت گردی کا مردانہ وار مقابلہ کریں گی اور جلد صوبے میں امن کا سورج چمکے گا۔ میر سرفراز بگٹی نے واضح کیا کہ پاکستان تاقیامت قائم رہنے کے لیے بنا ہے اور اسے کوئی نقصان نہیں پہنچا سکتا۔ انہوں نے امن و امان کی بحالی کے لیے پولیس اور سی ٹی ڈی کے کردار کو سراہا اور خوش آئند قرار دیا کہ بلوچستان کی باصلاحیت خواتین بھی دہشت گردی کے خلاف اس جنگ میں کسی سے پیچھے نہیں ہیں۔