بانی کے علاج اور کے پی سیکیورٹی پالیسی پر ڈیڈلاک، آئین کی بحالی تک تحریک جاری رہے گی: عامر ڈوگر

پی ٹی آئی کے سینئر رہنما عامر ڈوگر نے حکومتی وفد کے ساتھ ہونے والے مذاکرات کی ناکامی اور تعطل کی تفصیلات بتاتے ہوئے کہا ہے کہ حکومت بانی پی ٹی آئی کے علاج کے لیے ان کے ذاتی معالجین کو شامل کرنے پر بھی رضامند نہیں ہوئی۔ انہوں نے بتایا کہ مذاکرات کا تیسرا اہم اور بنیادی نکتہ خیبر پختونخوا میں سیکیورٹی اور انسدادِ دہشت گردی کی پالیسی تھی، جس پر اپوزیشن نے کسی بھی یکطرفہ فیصلے کے بجائے تمام سیاسی اور پارلیمانی اسٹیک ہولڈرز کو اعتماد میں لینے کا مطالبہ کیا۔ اپوزیشن کا موقف تھا کہ وفاقی اور صوبائی حکومتیں تمام نمائندہ جماعتوں کی مشاورت سے نیشنل ایکشن پلان کے تحت متفقہ حکمت عملی اپنائیں، تاہم حکومتی وفد نے وسیع مشاورت کی جگہ محض 72 گھنٹوں کے اندر فیصلے مسلط کرنے پر زور دیا۔

عامر ڈوگر کے مطابق تینوں بنیادی نکات پر نہ تو اپوزیشن اپنے موقف سے پیچھے ہٹی اور نہ ہی حکومت نے مطالبات ماننے پر آمادگی ظاہر کی، جس کے باعث مذاکراتی عمل ڈیڈلاک کا شکار ہو گیا۔ اپوزیشن رہنما نے اعادہ کیا کہ حکومت کی جانب سے مطالبات تسلیم نہ کیے جانے کے بعد عمران خان کی رہائی، آئین کی بحالی اور عدلیہ کی مکمل آزادی تک پُرامن احتجاجی تحریک جاری رہے گی۔