ماسکو فارمیٹ کا افغانستان سے متعلق آٹھواں مشاورتی اجلاس 5 اکتوبر کو ہو گا

افغانستان سے متعلق ماسکو فارمیٹ کا آٹھواں مشاورتی اجلاس 5 اکتوبر کو ماسکو میں منعقد ہوگا۔ سفارتی ذرائع کے مطابق اجلاس میں پاکستان اور افغانستان سمیت خطے کے دیگر ممالک کے وفود شریک ہوں گے، جہاں خطے کی تازہ ترین صورتحال اور باہمی امور پر تبادلہ خیال کیا جائے گا۔ پاکستانی وفد کی سربراہی افغانستان کے لیے پاکستان کے خصوصی نمائندے محمد صادق خان کریں گے، جبکہ وفد میں وزارت خارجہ کے ڈی جی نعیم اقبال چیمہ، روس میں پاکستان کے سفیر فیصل نیاز ترمذی اور افغانستان میں پاکستانی سفیر عبیدالرحمٰن نظامانی بھی شامل ہوں گے۔ اجلاس کے دوران پاک-افغان کشیدگی، علاقائی سلامتی اور باہمی تعاون کے امور پر اہم مشاورت متوقع ہے۔