ایران نے امریکی تجاویز کا جواب دے دیا، پابندیاں ختم کرنا ہوں گی: اسماعیل بقائی

ایرانی وزارتِ خارجہ کے ترجمان اسماعیل بقائی نے پریس بریفنگ کے دوران بتایا ہے کہ تہران امریکی تجاویز کا پہلے ہی تفصیلی جواب دے چکا ہے، جبکہ واشنگٹن کی جانب سے پیش کی گئی حالیہ نئی تجاویز بھی زیادہ تر سابقہ تجاویز سے ملتی جلتی ہیں جن کا بنیادی محور جوہری معاملہ ہے۔ ترجمان نے واضح کیا کہ ایران مذاکراتی عمل میں اپنے موقف اور ترجیحات کو پوری شفافیت سے سامنے رکھ رہا ہے، اور امریکا کی جانب سے عائد کردہ نئی پابندیوں کا فوری خاتمہ اور آبنائے ہرمز سے متعلق معاملات پر توجہ ایران کے بنیادی مطالبات میں شامل ہے۔

اسماعیل بقائی کے مطابق اسلام آباد میں مفاہمتی یادداشت پر دستخط کے بعد پیدا ہونے والی صورتحال کے تناظر میں بعض اہم نکات ایرانی قیادت کے پیشِ نظر ہیں، جبکہ دیگر زیرِ غور اضافی نکات بھی عنقریب امریکا تک پہنچا دیے جائیں گے۔ انہوں نے اعادہ کیا کہ تہران اپنے قومی مفادات اور پابندیوں کے خاتمے کو مذاکرات کی بنیاد بناتے ہوئے پیش رفت کا خواہاں ہے۔