گلے کے خطرناک وائرس نے مزید ایک بچہ جاں بحق ، تعداد 8 ہو گئی

اندرونِ سندھ کے علاقے میہڑ میں گلے کے خطرناک وائرس پر تاحال قابو نہ پایا جا سکا، جہاں ایک اور معصوم بچہ اس وبا کا شکار ہو کر جان کی بازی ہار گیا۔

تفصیلات کے مطابق گلے کے وائرس میں مبتلا 12 سالہ آصف علی جسکانی انتقال کر گیا۔ متوفی بچے کے والد کا کہنا ہے کہ چند روز قبل آصف علی کو گلے کا شدید انفیکشن لاحق ہوا تھا، جس پر اسے علاج کے لیے ڈی ایچ کیو اسپتال دادو میں داخل کرایا گیا۔

والد کے مطابق بچے کا کئی دن تک علاج جاری رہا تاہم حالت میں بہتری نہ آ سکی، بعد ازاں اسے لاڑکانہ ریفر کیا گیا، جہاں بھی مناسب طبی سہولیات فراہم نہ کی جا سکیں۔ بعد میں بچے کو کراچی منتقل کرنے کا فیصلہ کیا گیا مگر وہ کراچی پہنچنے سے قبل ہی راستے میں دم توڑ گیا۔

واضح رہے کہ میہڑ میں اس خطرناک وائرس کے باعث اب تک 8 معصوم بچے جاں بحق ہو چکے ہیں، جس کے بعد علاقے میں خوف و ہراس پھیل گیا ہے۔ شہریوں نے محکمہ صحت سے فوری نوٹس لینے، مؤثر طبی اقدامات اور متاثرہ علاقوں میں ہنگامی بنیادوں پر طبی سہولیات فراہم کرنے کا مطالبہ کیا ہے۔