صومالیہ میں جاں بحق پاکستانیوں کی میتیں ادیس ابابا پہنچ گئیں، وطن منتقلی کے انتظامات جاری

وزیراعظم محمد شہباز شریف کی خصوصی ہدایت پر صومالیہ میں جاں بحق ہونے والے تینوں پاکستانی شہریوں کی میتیں ایتھوپیا کے دارالحکومت ادیس ابابا پہنچا دی گئی ہیں جہاں سے ان کی پاکستان منتقلی کے تمام ضروری انتظامات کو حتمی شکل دی جا رہی ہے۔ حکام کے مطابق ایتھوپین ایئرلائنز کا عملہ تابوتوں اور دیگر دستاویزات کا جائزہ لے رہا ہے، جس کے فوراً بعد میتوں کو کراچی کی پرواز کے ذریعے روانہ کر دیا جائے گا۔ یاد رہے کہ جاں بحق ہونے والوں میں سید کاشف عمر، احمد انصاری اور رفیع اللہ شامل ہیں۔ وزیراعظم شہباز شریف نے گزشتہ روز مرحوم سید کاشف عمر کے بیٹے سے ٹیلیفونک گفتگو میں دلی تعزیت کا اظہار کرتے ہوئے میتوں کی جلد اور باحرمت وطن واپسی کے لیے تمام وسائل بروئے کار لانے کی یقین دہانی کرائی تھی۔