سکیورٹی خدشات: خیبرپختونخوا کے مختلف علاقوں میں دفعہ 144 نافذ

سکیورٹی خدشات کے پیش نظر خیبرپختونخوا کے جنوبی اضلاع کے مختلف علاقوں میں دفعہ 144 نافذ کر دی گئی ہے، جس کے تحت ضلعی انتظامیہ نے جنوبی وزیرستان لوئر، جنوبی وزیرستان اپر، ڈیرہ اسماعیل خان اور ضلع ٹانک میں آمدورفت اور مختلف اقسام کی گاڑیوں کی نقل و حرکت پر پابندیاں عائد کر دی ہیں۔ جنوبی وزیرستان لوئر اور اپر میں لوڈر رکشوں، کارگو گاڑیوں، شہزور، مزدا، ڈمپرز اور ٹریکٹر ٹرالیوں کی آمدورفت پر پابندی مختلف تاریخوں (10 اکتوبر تک) تک نافذ رہے گی۔ اسی طرح ڈی آئی خان میں ٹانک روڈ اور لنک روڈز پر پابندی صبح 6 سے شام 6 بجے تک ہوگی جبکہ ٹانک میں بھی افراد اور مسافر گاڑیوں کی نقل و حرکت محدود کی گئی ہے۔ انتظامیہ نے واضح کیا ہے کہ قانون نافذ کرنے والے اداروں، سکیورٹی فورسز اور ہنگامی خدمات کو اس پابندی سے استثنیٰ حاصل ہوگا، اور خلاف ورزی کرنے والوں کے خلاف دفعہ 188 کے تحت سخت قانونی کارروائی عمل میں لائی جائے گی۔