مصنوعی مٹھاس سے متعلق سائنس دانوں کا تشویشناک انکشاف!

مصنوعی مٹھاس (آرٹیفیشل سویٹنرز) کو طویل عرصے سے چینی کا ایک صحت مند متبادل مانا جاتا رہا ہے، تاہم ایک نئی طبی تحقیق نے اس عام تصور کو غلط ثابت کر دیا ہے۔ ٹفٹس یونیورسٹی کے فریڈمین اسکول آف نیوٹریشن سائنس اینڈ پالیسی کے پروفیسر مینگ وانگ اور ان کی ٹیم کی جانب سے کیے گئے 21 رینڈمائزڈ کلینیکل ٹرائلز کے جائزے سے معلوم ہوا ہے کہ کیلوریز نہ ہونے کے برابر ہونے کے باوجود مصنوعی مٹھاس خون میں شوگر کو کنٹرول کرنے کے بجائے اس کے توازن کو بگاڑ سکتی ہے۔ تحقیق کے مطابق، جو لوگ مصنوعی سویٹنرز کا مستقل استعمال کرتے ہیں، ان میں فاسٹنگ انسولین اور طویل مدتی شوگر کنٹرول کے اہم اشاریے ‘ایچ بی اے 1 سی’ (HbA1c) کی سطح پانی یا پلیسبو استعمال کرنے والوں کے مقابلے میں نسبتاً زیادہ دیکھی گئی، جبکہ ان میں انسولین کی حساسیت (Insulin Sensitivity) میں بھی کمی ریکارڈ کی گئی۔ ماہرین کا کہنا ہے کہ مصنوعی مٹھاس کے انسانی جسم اور میٹابولزم پر اثرات پہلے سے کہیں زیادہ پیچیدہ ہیں، جس کے لیے مزید تفصیلی تحقیق کی ضرورت ہے۔