کولمبیا میں 5.2 شدت کا زلزلہ

جنوبی امریکی ملک کولمبیا میں 5.2 شدت کے زلزلے کے شدید جھٹکے محسوس کیے گئے ہیں، جس کے بعد شہریوں میں خوف و ہراس پھیل گیا۔ عالمی میڈیا رپورٹس کے مطابق ‘جرمن ریسرچ سینٹر فار جیو سائنسز’ (GFZ) نے تصدیق کی ہے کہ منگل کی صبح کولمبیا کے مختلف حصوں میں زلزلے کے جھٹکے رکارڈ کیے گئے۔ زلزلہ پیما مرکز کی جانب سے فی الحال کسی بڑے جانی یا مالی نقصان کی فوری اطلاع موصول نہیں ہوئی ہے، تاہم مقامی انتظامیہ اور ایمرجنسی سروسز صورتِ حال کا جائزہ لے رہی ہیں۔

جی ایف زیڈ کی ابتدائی رپورٹ کے مطابق زلزلے کا مرکز 4.43 ڈگری شمالی عرض البلد اور 76.74 ڈگری مغربی طول البلد پر سطحِ زمین سے صرف 10 کلومیٹر کی گہرائی میں ریکارڈ کیا گیا۔ زلزلے کی کم گہرائی کی وجہ سے ارد گرد کے علاقوں میں جھٹکے واضح طور پر محسوس کیے گئے۔ جیولوجیکل سروے اور مقامی ادارے متاثرہ علاقوں میں لینڈ سلائیڈنگ اور آفٹر شاکس کے خدشات کے پیشِ نظر الرٹ جاری کر رہے ہیں۔