لیتھوانیا کی فضائی حدود میں داخل ہونے والا ڈرون تباہ کر دیا گیا

لیتھوانیا کے دارالحکومت ولنیئس اور اس کے گردونواح میں منگل کے روز نصف شب کے کچھ دیر بعد اس وقت فضائی خطرے کا الرٹ جاری کر دیا گیا جب ایک نامعلوم ڈرون غیر قانونی طور پر ملک کی فضائی حدود میں داخل ہو گیا۔ عالمی میڈیا رپورٹس کے مطابق لیتھوانیا کے نیشنل کرائسز مینجمنٹ سینٹر (NKVC) نے صورتِ حال کی سنگینی کو مدِنظر رکھتے ہوئے فوری طور پر نیٹو (NATO) کے لڑاکا طیاروں کو فضائی کارروائی کے لیے روانہ کیا۔

ابتدائی الرٹ کے تقریباً 30 منٹ بعد حکام نے اعلان کیا کہ نیٹو کے جنگی طیاروں نے کاؤنَس کے علاقے کے اوپر فضا میں ڈرون کو کامیابی سے تباہ کر دیا، جس کے بعد شہریوں کے لیے جاری کردہ فضائی خطرے کا الرٹ واپس لے لیا گیا۔ نیشنل کرائسز مینجمنٹ سینٹر کے ڈائریکٹر ولمانتاس وٹکاؤسکاس نے تصدیق کی کہ ڈرون کی موجودگی کا پتہ چلتے ہی فوری اور مؤثر دفاعی اقدام کیا گیا، تاہم انہوں نے واضح کیا کہ ڈرون کی ملکیت اور اس کے مقصد کے حوالے سے مزید تحقیقات جاری ہیں اور تفصیلی معلومات حاصل کی جا رہی ہیں۔