خواتین میں مصنوعی پلکوں کا استعمال، ماہرین نے خطرے کی گھنٹی بجا دی

ایک جدید طبی تحقیق میں انکشاف ہوا ہے کہ خوبصورتی اور گھنی پلکوں کے لیے کروائی جانے والی “آئی لیش ایکسٹینشنز” (مصنوعی پلکیں) خواتین کو خوردبینی کیڑوں یا مائٹس (Mites) کی ناخوشگوار افزائش کا شکار بنا سکتی ہیں، جو پلکوں کی جڑوں میں داخل ہو کر بینائی کو شدید متاثر کر سکتی ہیں۔ یورپی سوسائٹی آف کیٹریکٹ اینڈ ریفریکٹو سرجنز (ESCRS) کی 44 ویں کانگریس میں یوکرین کی نیشنل پیروگوف میموریل میڈیکل یونیورسٹی کے ماہرین نے اس طریقہ کار کے نقصانات پر مبنی شواہد پیش کیے۔ تحقیق کے مطابق، باقاعدگی سے آئی لیش ایکسٹینشنز کروانے والی 96 فیصد خواتین کی پلکوں میں یہ خوردبینی جاندار پائے گئے۔

طبی زبان میں ‘ڈیموڈیکس’ (Demodex) کہلانے والے یہ مائٹس مصنوعی پلکوں کو چپکانے کے لیے استعمال ہونے والے کیمیائی گلو اور جمع ہونے والے مردہ جلدی خلیات (Dead Skin Cells) کو بطور خوراک استعمال کرتے ہیں، جس کی وجہ سے ان کی تعداد میں تیزی سے اضافہ ہوتا ہے۔ اس کے علاوہ، آئی لیش ایکسٹینشنز مردہ مائٹس کو بھی وہیں پھنسا کر رکھتی ہیں جس کی وجہ سے وہ قدرتی طور پر جسم سے خارج نہیں ہو پاتے اور آنکھوں میں خارش، جلد کے خشک ہونے اور دھندلا نظر آنے جیسے مسائل پیدا کرتے ہیں۔

ماہرِ امراضِ چشم ڈاکٹر تاتیانا ژمود اور ان کی ٹیم نے 16 سے 28 سال کی 345 خواتین پر تحقیق کی، جس میں سے نصف خواتین ہر تین سے چار ہفتے بعد یہ بیوٹی ٹریٹمنٹ کرواتی تھیں، جبکہ 48 فیصد نے آنکھوں میں سرخی اور شدید تکلیف کی شکایت کی۔ ماہرین امراضِ چشم نے خبردار کیا ہے کہ برطانیہ جیسے ممالک میں جہاں ہر ہفتے 1 لاکھ 29 ہزار سے زائد آئی لیش ایکسٹینشنز کے پراسیجرز کیے جاتے ہیں، وہاں اس عمل کے باعث آنکھوں کے دائمی امراض پھیلنے کے خطرات میں تشویشناک حد تک اضافہ ہو رہا ہے۔