ایڈز کے خاتمے کیلئے علاج کے ساتھ مؤثر آگاہی پر توجہ دینا ہو گی: مصطفیٰ کمال

وفاقی وزیر برائے قومی صحت سید مصطفیٰ کمال کی زیر صدارت انسداد ایچ آئی وی/ایڈز سے متعلق جوائنٹ ورکنگ گروپ کا ایک اہم جائزہ اجلاس اسلام آباد میں منعقد ہوا، جس میں ملک بھر میں ایچ آئی وی کی صورتحال، جاری پروگرامز پر عملدرآمد اور نگرانی کے طریقہ کار پر تفصیلی غور کیا گیا۔ اجلاس میں میجر جنرل (ر) اظہر محمود کیانی، کامن مینجمنٹ یونٹ کے سربراہ، صوبائی سیکرٹریز صحت، اور چاروں صوبوں کے ہیلتھ کیئر کمیشنز کے نمائندوں کے علاوہ یو این ڈی پی کے حکام نے بھی شرکت کی، جبکہ پنجاب اور سندھ ہیلتھ کیئر کمیشنز نے انسدادِ ایڈز سے متعلق اپنے جاری اقدامات پر بریفنگ دی۔

وفاقی وزیر صحت مصطفیٰ کمال نے اجلاس سے خطاب کرتے ہوئے زور دیا کہ ایچ آئی وی کے مکمل خاتمے کے لیے صرف علاج ہی کافی نہیں بلکہ بیماری سے بچاؤ، احتیاطی تدابیر اور بڑے پیمانے پر مؤثر آگاہی پر توجہ دینی ہوگی۔ انہوں نے بتایا کہ بیماری سے متعلق علاج اور معلومات کے لیے قومی صحت تحفظ ہیلپ لائن 1166 فعال ہے۔ مزید برآں، انہوں نے وزارتِ تعلیم کے ساتھ مل کر انفیکشن کنٹرول اور عطائیت کے خاتمے کو تعلیمی نصاب میں شامل کرنے اور ایچ آئی وی کے پھیلاؤ کو روکنے کے لیے قانون نافذ کرنے والے اداروں کے ساتھ رابطہ مضبوط بنانے کی ہدایت کی۔

اجلاس کے دوران وزیراعظم ٹاسک فورس کی منظور شدہ سفارشات اور تجاویز پر عملدرآمد یقینی بنانے کے عزم کا اعادہ کیا گیا۔ اس موقع پر میجر جنرل (ر) اظہر محمود کیانی نے چاروں صوبوں کے ہیلتھ کیئر کمیشنز کو سخت ہدایات جاری کرتے ہوئے فیلڈ میں معائنہ اور نگرانی کا عمل تیز کرنے کی ہدایت کی، تاکہ ایچ آئی وی/ایڈز کے خاتمے کے لیے کیے گئے تمام فیصلوں اور اقدامات کا بلا تاخیر نفاذ ممکن بنایا جا سکے۔