ٹرمپ انتظامیہ کا اسرائیل کو تباہی کیلئے 2 ہزار پاؤنڈ وزنی بم فروخت کرنے کا منصوبہ

امریکی صدر ڈونلڈ ٹرمپ کی انتظامیہ نے اسرائیل کو 2 ارب 80 کروڑ ڈالر مالیت کے جدید اور تباہ کن اسلحے کی فروخت کا ایک نیا منصوبہ تیار کر لیا ہے۔ امریکی اخبار ‘واشنگٹن پوسٹ’ کی رپورٹ کے مطابق امریکی انتظامیہ نے اس مجوزہ عسکری ڈیل کے بارے میں کانگریس کو باضابطہ طور پر مطلع کر دیا ہے۔ یہ دفاعی پیکج گزشتہ سالوں کے دوران امریکہ کی جانب سے اسرائیل کو کی جانے والی 2 ہزار پاؤنڈ وزنی بموں کی منتقلی سے حجم اور تعداد میں کہیں زیادہ بڑا ہے۔

مجوزہ دفاعی پیکج کے تحت اسرائیل کو 2 ہزار پاؤنڈ وزنی کل 40 ہزار بم فراہم کیے جائیں گے، جن میں 20 ہزار ‘ایم کے 84’ (MK-84) بم اور 20 ہزار ‘بی ایل یو 117’ (BLU-117) بم شامل ہیں۔ علاوہ ازیں، اس اہم اسلحہ ڈیل میں 20 ہزار انتہائی مہلک ‘پینیٹریٹر وار ہیڈز’ (Penetrator Warheads) کی فروخت بھی شامل ہے جو زیرِ زمین مضبوط ترین ٹھکانوں اور بنکرز کو تباہ کرنے کی صلاحیت رکھتے ہیں۔