حالتِ سکون میں پاؤں کی ہڈیوں میں درد دل کی خطرناک بیماری کی علامت، ماہرین

ماہرینِ صحت نے خبردار کیا ہے کہ آرام کی حالت میں پاؤں یا انگلیوں میں محسوس ہونے والا مسلسل درد—جو بغیر چلے پھرے یا پاؤں پر وزن ڈالے بغیر بھی ختم نہ ہو—دل کی شدید بیماری اور شریانوں کی تنگی کی علامات ہو سکتا ہے۔ طبی ماہرین کے مطابق ہر 100 میں سے ایک شخص زندگی میں اس درد کا شکار ہو سکتا ہے۔ یہ علامت “کرونک لمب تھریٹننگ اسکیمیا” (CLTI) کی نشاندہی کرتی ہے، جسے پہلے “کریٹیکل لمب اسکیمیا” کہا جاتا تھا۔ یہ حالت دراصل “پیریفیرل آرٹری ڈیزیز” (PAD) کا آخری اور انتہائی خطرناک مرحلہ ہے، جس میں شریانوں میں چربی اور پلاک جمنے سے ٹانگوں اور پاؤں تک خون کی فراہمی شدید متاثر ہوتی ہے۔

طبی تحقیق کے مطابق اگر سی ایل ٹی آئی کے مریض بروقت علاج نہ کروائیں تو نوبت نہ بھرنے والے زخموں، السر، ٹشوز کی موت اور سنگین صورتوں میں ٹانگ یا پاؤں کاٹنے تک پہنچ سکتی ہے۔ جرنل آف ویسکیولر سرجری میں شائع رپورٹ کے مطابق، آرام کے دوران درد کی شکایت والے 80 فیصد مریض تشخیص کے 10 سال کے اندر زندگی کی بازی ہار جاتے ہیں، کیونکہ ٹانگوں کی شریانوں کی بلاکیج پورے جسم میں قلبی شریانوں کے مسدود ہونے سے منسلک ہوتی ہے جس سے ہارٹ اٹیک اور فالج کا خطرہ انتہائی بڑھ جاتا ہے۔ ماہرین نے زور دیا ہے کہ ان علامات کی ابتدائی پہچان اور بروقت جراحی یا طبی علاج سے جان لیوا پیچیدگیوں اور موت کے خطرے کو کافی حد تک کم کیا جا سکتا ہے