پاکستان کا حوثی حملوں کے خلاف سعودی دفاعی اقدامات کی مکمل حمایت کا اعلان

اقوام متحدہ میں پاکستان کے مستقل مندوب عاصم افتخار احمد نے کہا ہے کہ پاکستان حوثی ملیشیا کے حملوں کے خلاف سعودی عرب کے تمام دفاعی اقدامات اور اس کے حقِ دفاع کی مکمل حمایت کا اعلان کرتا ہے۔ اقوام متحدہ کی سلامتی کونسل کے اجلاس سے خطاب کرتے ہوئے پاکستانی مندوب نے سعودی عرب پر حوثیوں کے مسلسل حملوں کی شدید مذمت کی اور یمن کی موجودہ معاشی و سیکیورٹی صورتِ حال پر گہری تشویش کا اظہار کیا۔ انہوں نے واضح کیا کہ پاکستان، سعودی عرب کی خودمختاری، جغرافیائی سالمیت اور سیکیورٹی کی بلا مشروط حمایت جاری رکھے گا۔

پاکستانی مندوب عاصم افتخار نے اپنے خطاب میں خبردار کیا کہ باب المندب اور بحیرہ احمر میں تجارتی جہازوں پر حملے عالمی معیشت اور عالمی سپلائی چین کو شدید متاثر کر رہے ہیں، جس کا فوری تدارک ضروری ہے۔ دوسری جانب اجلاس سے خطاب کرتے ہوئے یمن کے مستقل مندوب نے عالمی برادری اور سلامتی کونسل سے مطالبہ کیا کہ وہ حوثیوں کو غیر قانونی طور پر اسلحے کی فراہمی روکنے کے لیے فوری اور اثر انداز اقدامات کریں۔ یمنی مندوب نے حوثی ملیشیا کی جارحانہ کارروائیوں کو یمن سمیت پورے خطے کی امن و سلامتی کے لیے ایک انتہائی سنگین خطرہ قرار دیا۔