وزن کم کرنے والی ادویات کا خودکشی کے خیالات سے تعلق کا انکشاف

جنوبی کوریا میں کی گئی ایک جامع سائنسی تحقیق میں انکشاف ہوا ہے کہ وزن کم کرنے کے لیے استعمال ہونے والی ادویات کا ذہنی صحت پر گہرا منفی اثر مرتب ہو سکتا ہے، اور ان کا استعمال ڈپریشن اور خودکشی کے خیالات میں اضافے کا باعث بن سکتا ہے۔ ڈاکٹر کی ینگ سون اور ان کے ساتھی محققین نے 27 ہزار بالغ افراد کی ذہنی صحت اور ادویاتی ریکارڈ کا باریک بینی سے جائزہ لیا، جن میں سے 846 افراد ایسے تھے جنہوں نے معالج کی تجویز پر وزن کم کرنے کی ادویات (GLP-1 ریسپٹر ایگونسٹس) کا باقاعدہ استعمال کیا تھا۔

تحقیق کے نتائج کے مطابق، وزن کم کرنے کی ادویات استعمال کرنے والے افراد میں، دوا نہ لینے والوں کے مقابلے میں ڈپریشن کا شکار ہونے کا امکان 93 فیصد زیادہ جبکہ خودکشی کے خیالات رپورٹ کرنے کا امکان 168 فیصد زیادہ دیکھا گیا۔ سائنس دانوں نے تقریباً ایک دہائی پر محیط اس طویل المدتی جائزہ رپورٹ میں واضح کیا کہ جو افراد ادویات کے استعمال کے بعد اپنے وزن میں دوبارہ اضافے (Rebound Weight Gain) کا شکار ہوتے ہیں، ان میں نفسیاتی مسائل اور ذہنی تنزلی کا یہ خطرہ مزید شدت اختیار کر جاتا ہے۔

واضح رہے کہ امریکی فوڈ اینڈ ڈرگ ایڈمنسٹریشن (ایف ڈی اے) کو بھی ایسے سینکڑوں مریضوں کی جانب سے شکایات موصول ہو چکی ہیں جن کا کہنا تھا کہ وزن گھٹانے کی ان جدید ادویات کے استعمال کے دوران انہیں شدید مایوسی اور خودکشی کے خیالات کا سامنا کرنا پڑا۔ رپورٹس کے مطابق متعدد ایسے افراد میں بھی یہ نفسیاتی علامات سامنے آئیں جن کا ماضی میں کبھی بھی کسی ذہنی بیماری کا ریکارڈ نہیں تھا۔ اس تحقیق کے بعد طبی ماہرین نے تاکید کی ہے کہ ڈاکٹرز وزن کم کرنے کی ادویات تجویز کرتے وقت مریضوں کی ذہنی صحت کی ہسٹری اور نگرانی کو ہر صورت یقینی بنائیں۔