اقوام متحدہ کا معائنہ کاروں کو غزہ کے تمام حصوں تک رسائی دینے کا مطالبہ

اقوام متحدہ نے عالمی معائنہ کاروں اور نگران ٹیموں کو غزہ کے تمام متاثرہ علاقوں تک فوری اور بلا تعطل رسائی دینے کا پرزور مطالبہ کیا ہے۔ اقوام متحدہ کے ہائی کمشنر برائے انسانی حقوق وولکر ترک نے کہا ہے کہ غزہ میں ملنے والی انسانی باقیات میں زیادہ تر تعداد خواتین اور معصوم بچوں کی ہے، جو اس بات کی جانب واضح اشارہ کرتے ہیں کہ خطے میں سنگین جنگی جرائم کا ارتکاب کیا گیا ہو گا۔ انہوں نے شدید تشویش کا اظہار کرتے ہوئے کہا کہ اسرائیل کے زیرِ کنٹرول علاقوں کو بلڈوزروں کے ذریعے یکسر زمین بوس کیا جا رہا ہے اور لاشوں کی بھی حرمت و احترام کا خیال نہیں رکھا جا رہا۔

وولکر ترک نے عالمی برادری اور انسانی حقوق کے اداروں پر زور دیا کہ متاثرین کی شناخت، فرانزک شواہد کی محفوظ جمع آوری، تدفین کے مقامات کے اندراج اور لواحقین کو فوری اطلاع دینے کے عمل کو یقینی بنایا جائے۔ ان کا کہنا تھا کہ شواہد کو مٹانے سے روکنا عدل و انصاف کی فراہمی کے لیے انتہائی ضروری ہے۔ واضح رہے کہ اسرائیلی فوج کے فضائی اور زمینی حملوں کے نتیجے میں اب تک 73 ہزار سے زائد فلسطینی شہید اور لاکھوں بے گھر ہو چکے ہیں، جس کے باعث پورے غزہ میں شدید انسانی بحران جنم لے چکا ہے۔