خیبرپختونخوا: چکن گونیا کے کیسز میں اضافہ، نوشہرہ کے متعدد گاؤں متاثر

خیبر پختونخوا کے ضلع نوشہرہ کے تاریخی علاقے زیارت کاکا صاحب اور اس کے گرد و نواح کے متعدد دیہات میں مچھر کے کاٹنے سے پھیلنے والی وائرل بیماری ‘چکن گونیا’ کے کیسز میں مسلسل اور تشویش ناک اضافہ ہو رہا ہے۔ ذرائع کے مطابق مقامی ہسپتالوں اور طبی مراکز میں روزانہ 50 سے 100 کے قریب چکن گونیا سے متاثرہ مریض رپورٹ ہو رہے ہیں، جس کے باعث ہسپتالوں پر شدید دباؤ بڑھ گیا ہے۔ مریضوں کی اتنی بڑی تعداد کی آمد کے باوجود طبی عملے کی قلت اور بنیادی ادویات و سہولیات کے فقدان کے باعث شہریوں کو شدید مشکلات کا سامنا کرنا پڑ رہا ہے۔

متاثرہ علاقوں کے مکینوں نے علاقے میں ابھرتی ہوئی تشویش ناک صورتِ حال پر گہرے دکھ اور برہمی کا اظہار کرتے ہوئے حکومتِ خیبر پختونخوا اور محکمہ صحت سے فوری ہنگامی اقدامات کا مطالبہ کیا ہے۔ اہل ِعلاقہ نے حکومت سے چکن گونیا کے تیزی سے بڑھتے ہوئے کیسز کے پیشِ نظر علاقے میں ہیلتھ ایمرجنسی نافذ کرنے، ہسپتالوں میں اضافی طبی عملہ تعینات کرنے اور وافر مقدار میں ادویات کی فراہمی کو یقینی بنانے کی اپیل کی ہے۔ واضح رہے کہ چکن گونیا ڈینگی کی طرح مچھر کے کاٹنے سے پھیلنے والی ایک وائرل بیماری ہے جس کی اہم علامات میں شدید بخار، جوڑوں اور پٹھوں میں شدید درد، خارش اور سوجن شامل ہیں