نیویارک سے 36 نایاب اور چوری شدہ پاکستانی نوادرات کی واپسی، امریکہ اور پاکستان کے درمیان معاہدہ طے

نیویارک میں واقع پاکستان کے قونصلیٹ جنرل نے نایاب اور تاریخی نوادرات کی واپسی کے سلسلے میں ایک اہم پیش رفت کا اعلان کیا ہے۔ نیویارک کاؤنٹی ڈسٹرکٹ اٹارنی کے دفتر میں منعقدہ ایک باوقار تقریب کے دوران پاکستان سے چوری شدہ نایاب آثارِ قدیمہ کی ایک نئی کھیپ باضابطہ طور پر پاکستانی حکام کے حوالے کر دی گئی۔ اس موقع پر حکومتِ پاکستان اور ڈسٹرکٹ اٹارنی کے دفتر کے درمیان ایک باقاعدہ معاہدے پر دستخط کیے گئے، جس پر پاکستان کی جانب سے قونصل جنرل عامر احمد اتوزئی نے دستخط کیے۔

معاہدے کے تحت پاکستان کو مجموعی طور پر 36 نایاب تاریخی نوادرات واپس منتقل کیے جا رہے ہیں، جن میں چوتھی صدی عیسوی کا سرمئی پتھر (Grey Schist) سے تراشا گیا ‘یکشی’ کا مجسمہ اور 2700 تا 3000 قبل مسیح کی 35 مٹی (Terracotta) سے بنی بارآوری کی مورتیاں (Fertility Figures) شامل ہیں۔ تقریب سے خطاب کرتے ہوئے قونصل جنرل عامر احمد اتوزئی نے نوادرات کی بحالی اور اسمگلنگ کی روک تھام کے لیے ڈسٹرکٹ اٹارنی آفس کے ‘اینٹیکوٹیز ٹریفکنگ یونٹ’ کی کوششوں کا شکریہ ادا کیا۔ انہوں نے کہا کہ ثقافتی ورثہ پوری انسانیت کی مشترکہ میراث ہے اور ان نوادرات کی قانونی واپسی سے پاکستان اور دنیا بھر کی آنے والی نسلوں کو انسانی تہذیب کی ان نایاب نشانیوں کو سمجھنے اور ان سے سیکھنے کا موقع ملے گا۔