لکی مروت: سیمنٹ فیکٹری کی بس کے قریب دھماکا، ایک شخص جاں بحق، متعدد زخمی

لکی مروت کے علاقے بیگو خیل میں ناورخیل موڑ کے قریب نجی سیمنٹ فیکٹری کی بس کے نزدیک آئی ای ڈی دھماکے کے نتیجے میں ایک شخص جاں بحق جبکہ دو خواتین سمیت 8 افراد زخمی ہو گئے۔

پولیس کے مطابق دہشت گردوں نے بیگو خیل گاؤں سے نجی سیمنٹ فیکٹری جانے والی بس کو نشانہ بنایا، جس کے باعث بس مکمل طور پر تباہ ہو گئی۔ دھماکے میں فیکٹری کا ایک ملازم موقع پر جاں بحق ہوا، جبکہ زخمیوں میں فیکٹری کے چار ملازمین اور دو خواتین بھی شامل ہیں۔ حکام کا کہنا ہے کہ بعض زخمیوں کی حالت تشویشناک ہے۔

پولیس کے مطابق زخمیوں کو فوری طور پر قریبی ہسپتال منتقل کر دیا گیا، جبکہ واقعے کے بعد علاقے میں سکیورٹی مزید سخت کر دی گئی ہے اور سرچ آپریشن جاری ہے۔

ابتدائی رپورٹ
واقعے سے متعلق ابتدائی رپورٹ بھی مرتب کر لی گئی ہے، جس کے مطابق دھماکا صبح 6 بج کر 30 منٹ پر پیش آیا۔ رپورٹ میں ایک ہلاکت اور 8 زخمیوں کی تصدیق کی گئی ہے، جبکہ مقدمہ تھانہ سٹی لکی مروت میں درج کیے جانے کی تیاری جاری ہے۔ پولیس نے تحقیقات کا آغاز کر دیا ہے۔