امریکن ریڈ کراس کا خون کے ذخائر کی دوسری قومی سطح کی قلت کا اعلان

امریکن ریڈ کراس نے ملک بھر میں خون کے ذخائر کی دوسری قومی سطح کی شدید قلت کا رسمی اعلان کرتے ہوئے ہسپتالوں کو گروپ او (O) بلڈ کی فراہمی محدود کرنا شروع کر دی ہے۔ عالمی میڈیا کی رپورٹ کے مطابق، اس وقت امریکہ میں او پوزیٹو خون کا صرف ایک دن سے بھی کم کا ذخیرہ باقی رہ گیا ہے، جو کہ عام طور پر کل استعمال کا 60 فیصد ہوتا ہے۔ ریڈ کراس کے مطابق اس موسم گرما میں شدید گرمی، فضائی آلودگی اور مختلف بیماریوں کے پھیلنے کی وجہ سے عطیات دینے والوں کی تعداد میں نمایاں کمی آئی ہے۔ ادارے کے صدر کرس ہرودا نے صورتحال کو تشویشناک قرار دیتے ہوئے تمام اہل افراد سے فوری طور پر خون عطیہ کرنے کی اپیل کی ہے تاکہ ایمرجنسی اور علاج کے منتظر مریضوں کی جانیں بچائی جا سکیں۔