کراچی: کیمیکل فیکٹری میں آگ لگ گئی

گلشن معمار میں واقع ایک کیمیکل فیکٹری میں لگنے والی شدید آگ پر فائر بریگیڈ کے عملے نے مسلسل جدوجہد کے بعد کامیابی سے قابو پا لیا ہے۔ حکام کے مطابق حادثے کی اطلاع ملتے ہی ریسکیو ٹیمیں اور فائر بریگیڈ کی 6 گاڑیاں موقع پر پہنچ گئیں، جنہوں نے آگ بجھانے کے عمل میں حصہ لیا۔ آگ پر مکمل قابو پانے کے بعد اب فیکٹری میں کولنگ کا عمل جاری ہے۔

فیکٹری انتظامیہ کے مطابق عمارت میں کوئلہ اور کیمیکل کا بڑی مقدار میں ذخیرہ موجود تھا، جس کے باعث دیکھتے ہی دیکھتے آگ نے پوری عمارت کو اپنی لپیٹ میں لے لیا۔ آگ بھڑکتے ہی ہنگامی بنیادوں پر اندر موجود عملے کو بحفاظت باہر نکال لیا گیا جس سے ایک بڑا حادثہ ٹل گیا۔

فائر بریگیڈ اور ریسکیو حکام کا کہنا ہے کہ بروقت کارروائی کی وجہ سے فیکٹری میں موجود تمام افراد محفوظ رہے اور ابتدائی معلومات کے مطابق واقعے میں کسی قسم کا جانی نقصان نہیں ہوا ہے۔