ہنگو میں چیک پوسٹ پر حملہ:8 دہشتگرد جہنم واصل، ڈی ایس پی سمیت 7 اہلکار شہید

خیبر پختونخوا کے علاقے ہنگو کی خزینہ بانڈہ چیک پوسٹ پر دہشت گردوں کے حملے کے دوران پولیس نے بہادری سے مقابلہ کرتے ہوئے شدید فائرنگ کے تبادلے میں 8 شرپسندوں کو ہلاک کر دیا، تاہم اس کارروائی میں ڈی ایس پی سٹی دیار خان سمیت 7 پولیس اہلکار جامِ شہادت نوش کر گئے۔

ڈی پی او کے مطابق دہشت گردوں کے خلاف کیے گئے اس آپریشن میں ڈی ایس پی مجاہد حسین سمیت مجموعی طور پر 22 پولیس اہلکار زخمی ہوئے، جنہیں فوری طور پر بہترین طبی سہولیات کی فراہمی کے لیے قریبی ہسپتال منتقل کر دیا گیا ہے۔ سکیورٹی فورسز نے پورے علاقے کو گھیرے میں لے کر سرچ آپریشن مزید تیز کر دیا ہے تاکہ تمام شرپسندوں کا خاتمہ ممکن بنایا جا سکے۔

پولیس کے اعلیٰ حکام نے شہداء کو خراجِ عقیدت پیش کرتے ہوئے عزم ظاہر کیا ہے کہ شہداء کی عظیم قربانیاں ہرگز رائیگاں نہیں جانے دی جائیں گی اور علاقے میں دہشت گردی کے مکمل خاتمے تک کارروائی جاری رہے گی۔