امریکا اور ایران کی کشیدگی کے باوجود عالمی منڈی میں تیل کی قیمتوں میں کمی

امریکا اور ایران کے درمیان بڑھتی ہوئی شدید کشیدگی اور جنگی صورتحال کے باوجود عالمی منڈی میں خام تیل کی قیمتوں میں کمی ریکارڈ کی گئی ہے۔ برطانوی خبر ایجنسی کے مطابق برینٹ خام تیل کی قیمت 1.29 ڈالر کمی کے بعد 89.45 ڈالر فی بیرل جبکہ امریکی ویسٹ ٹیکساس انٹرمیڈیٹ (WTI) 56 سینٹ کمی کے ساتھ 83.90 ڈالر فی بیرل پر آگیا ہے۔ معاشی ماہرین اور رپورٹ کے مطابق مشرقِ وسطیٰ میں تنازع میں شدت آنے کے باوجود سمندری راستوں سے تیل بردار جہازوں (ٹینکرز) کی آمد و رفت جاری رہنے کی وجہ سے قیمتیں نیچے آئی ہیں۔ واضح رہے کہ اس سے قبل گزشتہ کاروباری سیشنز میں جنگی خدشات کے باعث تیل کی قیمتوں میں 6 سے 7 فیصد تک کا بڑا اضافہ دیکھا گیا تھا۔