سعودی وزیر دفاع کی امریکی نائب صدر سے ملاقات، ایران سے کشیدگی میں کمی کا اعادہ

عراق میں ایران نواز ملیشیاؤں کے خلاف امریکہ اور سعودی عرب کے مشترکہ فضائی حملوں کے بعد سعودی وزیر دفاع شہزادہ خالد بن سلمان نے وائٹ ہاؤس میں امریکی نائب صدر جے ڈی وینس سے ہنگامی ملاقات کی ہے۔ امریکی نیوز ویب سائٹ ‘ایگزیوس’ کے مطابق اس ملاقات کا بنیادی مقصد سعودی ولی عہد شہزادہ محمد بن سلمان کا ایران اور علاقائی صورتحال سے متعلق خصوصی پیغام امریکی قیادت تک پہنچانا تھا۔ ملاقات میں سعودی وزیر دفاع نے واضح کیا کہ عراقی ملیشیاؤں کی جانب سے سعودی توانائی کی تنصیبات پر حملے ‘ریڈ لائن’ کے مترادف تھے، جس کے باعث جوابی دفاعی کارروائی ناگزیر ہوئی۔ انہوں نے زور دیا کہ سعودی عرب کی پالیسی جنگ کو وسعت دینا نہیں بلکہ اپنی دفاعی صلاحیت کا اظہار اور کشیدگی میں کمی لانا ہے، جب کہ اسرائیل کے برعکس مملکت تناؤ کم کرنے کو ہی زیادہ مؤثر راستہ سمجھتی ہے۔