سائبر فراڈ کے مراکز میں کام کیلئے لوگوں کو ورغلانے کے رجحان میں اضافہ ہوا: اقوام متحدہ

اقوام متحدہ کے ذیلی ادارے انٹرنیشنل آرگنائزیشن فار مائیگریشن (IOM) نے خبردار کیا ہے کہ بین الاقوامی مجرمانہ نیٹ ورکس لاکھوں افراد کو جعلی ملازمتوں کا جھانسہ دے کر سائبر فراڈ کے مراکز میں کام کرنے پر مجبور کر رہے ہیں۔ آئی او ایم کی ڈائریکٹر جنرل ایمی پوپ نے جنیوا میں صحافیوں کو بتایا کہ 80 سے زائد ممالک کے انگریزی بولنے والے اور اعلیٰ تعلیم یافتہ افراد کو سوشل میڈیا کے ذریعے بیرون ملک پرکشش ملازمتوں کا لالچ دیا جاتا ہے۔ تاہم، ان کے پہنچتے ہی شناختی دستاویزات ضبط کر کے انہیں تشدد، دھمکیوں اور قرض کے بوجھ تلے سائبر کرائمز پر مجبور کیا جاتا ہے۔ ادارے کی رپورٹ کے مطابق اس قسم کا نیٹ ورک خاص طور پر ایشیا میں تیزی سے پھیل رہا ہے، جہاں گزشتہ چند سالوں میں ہزاروں متاثرین کو امداد فراہم کی گئی ہے جبکہ ان فراڈ کمپاؤنڈز کے باعث خطے کو اربوں ڈالر کا مالی نقصان بھی برداشت کرنا پڑا ہے۔