شہید اہلکاروں نے جانیں قربان کرکے دہشت گردوں کے ناپاک عزائم کو ناکام بنایا: محسن نقوی

وزیر داخلہ محسن نقوی نے ضلع ہنگو میں پولیس چیک پوسٹ پر خوارجی دہشت گردوں کے بزدلانہ حملے کی شدید الفاظ میں مذمت کی ہے۔ اپنے ایک مذمتی بیان میں وزیر داخلہ نے شہید ہونے والے پولیس اہلکاروں کو زبردست خراجِ عقیدت پیش کیا اور شہداء کے غمزدہ لواحقین سے دلی ہمدردی اور تعزیت کا اظہار کیا۔

محسن نقوی نے حملے میں زخمی ہونے والے پولیس اہلکاروں کی جلد صحتیابی کے لیے دعا کرتے ہوئے کہا کہ شہید اہلکاروں نے اپنی جانوں کا نذرانہ پیش کر کے خوارجیوں کے ناپاک عزائم کو ناکام بنایا۔ انہوں نے پولیس کی بروقت اور موثر کارروائی کو سراہا جس کے نتیجے میں 8 خوارجی دہشت گرد ہلاک ہوئے۔

وزیر داخلہ نے مزید کہا کہ خیبرپختونخوا پولیس دہشت گردی کے خلاف جنگ میں فرنٹ لائن پر کھڑی ہے اور امن کے قیام کے لیے ان کی لازوال قربانیوں کو قوم سلام پیش کرتی ہے۔