سعودی ولی عہد کا سپین کے وزیراعظم سے رابطہ، حوثی حملوں کی شدید مذمت

سعودی ولی عہد و وزیر اعظم شہزادہ محمد بن سلمان اور سپین کے وزیر اعظم پیڈرو سانچیز کے درمیان ٹیلی فونک رابطہ ہوا ہے جس میں دوطرفہ تعلقات اور خطے کی مجموعی صورتحال پر تفصیلی تبادلہ خیال کیا گیا۔ عالمی میڈیا رپورٹس کے مطابق دونوں رہنماؤں نے سعودی عرب اور سپین کے درمیان تعاون کا جائزہ لیتے ہوئے مختلف شعبوں میں تعلقات کو مزید مضبوط بنانے کے طریقوں پر بات چیت کی۔ گفتگو کے دوران ہسپانوی وزیراعظم پیڈرو سانچیز نے سعودی تجارتی جہازوں پر حوثیوں کے حالیہ حملوں کی شدید مذمت کی اور بحیرہ احمر میں آزادانہ جہاز رانی (فریڈم آف نیویگیشن) کو لاحق خطرات کو کھل کر مسترد کر دیا۔ انہوں نے مملکت کی سلامتی، خود مختاری اور قومی مفادات کے تحفظ کے لیے سعودی عرب کے ساتھ مکمل یکجہتی کا اعادہ بھی کیا۔