امریکی فوج کا لاک ہیڈ مارٹن کیساتھ انٹر سیپٹر میزائلز کی تیاری کیلئے 58.6 ارب ڈالر کا معاہدہ

امریکی فوج نے ‘لاک ہیڈ مارٹن’ کو پیٹریاٹ فضائی دفاعی نظام کے لیے انٹرسیپٹر میزائل تیار کرنے کا ایک بڑا معاہدہ دیا ہے، جس کی مجموعی مالیت 58.6 ارب ڈالر تک پہنچ سکتی ہے۔ پینٹاگون کی جانب سے جاری کردہ اعلامیے کے مطابق، رواں سال اپریل میں طے پانے والے 4.7 ارب ڈالر کے ایک سالہ معاہدے کو اب 7 سالہ منصوبے میں تبدیل کر دیا گیا ہے، جس کے تحت مالی سال 2026ء سے 2032ء تک پیٹریاٹ میزائلوں کی خریداریاں کی جائیں گی۔ اس معاہدے کی بدولت کمپنی 2030ء کے اختتام تک میزائلوں کی پیداوار 3 گنا تک بڑھا سکے گی جس سے روزگار کے نئے مواقع بھی پیدا ہوں گے۔ امریکی انتظامیہ کا یہ اقدام یوکرین اور مشرق وسطیٰ کے تنازعات کے باعث امریکہ کے دفاعی ذخائر پر بڑھتے ہوئے دباؤ اور پیداوار تیز کرنے کی کوششوں کا حصہ ہے۔