لاہور: ’’نک دا کوکا‘‘ گانا گانے پر مقدمہ درج

لاہور میں میوزک ایونٹ کے دوران متنازعہ گانا گانے پر پولیس نے مقدمہ درج کر لیا ہے۔ پولیس کے مطابق گانے کے بول میں ’’قیدی نمبر 804‘‘ کا ذکر کیے جانے پر عوام میں اشتعال پیدا ہوا۔

یہ مقدمہ تھانہ باغبانپورہ میں شالیمار گارڈن کے انچارج کی مدعیت میں درج کیا گیا ہے۔ ایف آئی آر کے مطابق والڈ سٹی اتھارٹی کی جانب سے شالیمار گارڈن میں میوزک اینڈ کلچرل نائٹ کا اہتمام کیا گیا تھا۔

ایف آئی آر میں کہا گیا ہے کہ تقریب کے دوران قوال شیراز خان نے انتظامیہ کی اجازت کے بغیر ’’نک دا کوکا‘‘ گانا گایا، جس میں متنازعہ الفاظ شامل تھے۔ پولیس کے مطابق گانے کے نتیجے میں موقع پر موجود عوام میں اشتعال پیدا ہوا، جسے انتظامیہ نے بروقت کنٹرول کر لیا۔

پولیس کا کہنا ہے کہ واقعے کے بعد تھانہ باغبانپورہ میں مقدمہ درج کر کے مزید قانونی کارروائی کا آغاز کر دیا گیا ہے۔