ایرانی ویمنز فٹبال ٹیم کی کپتان بھی آسٹریلیا میں پناہ کی درخواست سے دستبردار

آسٹریلیا میں مقیم ایرانی ویمنز فٹبال ٹیم کی کپتان زہرا قنبری نے سیاسی پناہ کی درخواست واپس لیتے ہوئے وطن واپسی کا فیصلہ کر لیا ہے۔ ایرانی سرکاری خبر رساں ایجنسی کے مطابق، زہرا قنبری جلد آسٹریلیا سے ملائیشیا روانہ ہوں گی، جہاں سے وہ ایران واپس پہنچیں گی۔ ان سے قبل ٹیم کی تین دیگر کھلاڑی اور ایک اسٹاف ممبر بھی پناہ کی پیشکش سے دستبردار ہو کر واپسی کا ارادہ ظاہر کر چکے ہیں۔ اے ایف سی ایونٹ کے اختتام پر ٹیم کے 6 اراکین آسٹریلیا میں رک گئے تھے جنہیں آسٹریلوی وزیر داخلہ ٹونی برک نے قومی ترانہ نہ گانے پر ممکنہ سزا کے خدشے کے پیش نظر پناہ کی پیشکش کی تھی۔

ٹیم کے 26 رکنی اسکواڈ میں سے صرف 6 کھلاڑیوں اور ایک معاون رکن نے انسانی ہمدردی کی بنیاد پر پناہ قبول کی تھی، جبکہ باقی ٹیم 9 مارچ کو روانہ ہو گئی تھی۔ اب کپتان سمیت پانچ اراکین کے فیصلے کی تبدیلی کے بعد صرف ایک کھلاڑی آسٹریلیا میں مقیم رہ گئی ہے۔ یاد رہے کہ یہ کھلاڑی کوالالمپور میں موجود اپنی باقی ٹیم کے ساتھ شامل ہو کر تہران واپس روانہ ہوں گے۔