قومی ویمنز ٹیم ایشیا کپ میں شرکت کیلئے دبئی پہنچ گئی

دبئی: ویمنز ایشیا کپ میں شرکت کے لیے پاکستان ویمن کرکٹ ٹیم دبئی پہنچ گئی ہے، جہاں قومی کھلاڑیوں کو پہلے دن مکمل آرام کی ہدایت کی گئی ہے۔

پاکستان ویمن ٹیم اپنے دورے کے دوسرے دن سے باقاعدہ ٹریننگ سیشن کا آغاز کرے گی۔ اس کے علاوہ قومی ٹیم کی کپتان فاطمہ ثنا ویمنز ایشیا کپ کی ٹرافی کی پروقار رونمائی کی تقریب میں بھی شرکت کریں گی، جس میں تمام ٹورنامنٹ کی کپتانیں موجود ہوں گی۔

ویمنز ایشیا کپ 28 اگست سے 13 ستمبر تک دبئی میں کھیلا جائے گا۔ ٹورنامنٹ کے شیڈول کے مطابق پاکستان ٹیم اپنا پہلا میچ یکم ستمبر کو تھائی لینڈ کے خلاف کھیلے گی۔

شائقینِ کرکٹ کا سب سے بڑا مقابلہ 5 ستمبر کو ہوگا جب پاکستان اور روایتی حریف بھارت کی ٹیمیں آمنے سامنے ہوں گی۔ قومی ٹیم اپنا آخری گروپ میچ 7 ستمبر کو ہانگ کانگ کے خلاف کھیلے گی۔