پمز ہسپتال میں زیادہ بچوں کی اموات دم گھٹنے سے ہوئیں: طارق فضل چودھری

اسلام آباد: وفاقی وزیر برائے پارلیمانی امور طارق فضل چودھری نے کہا ہے کہ پمز ہسپتال (PIMS) میں نومولود بچوں کے وارڈ میں آتشزدگی کے باعث زیادہ تر اموات دھواں بھرنے اور دم گھٹنے سے ہوئی ہیں۔

پمز ہسپتال کا دورہ کرنے کے بعد میڈیا سے گفتگو کرتے ہوئے وفاقی وزیر نے بتایا کہ ابتدائی معلومات کے مطابق ہسپتال میں آگ شارٹ سرکٹ کی وجہ سے لگی، جو گیس پائپ لائنز، پلاسٹک کے طبی آلات اور آکسیجن سپلائی کی موجودگی کے باعث تیزی سے پھیل گئی۔

طارق فضل چودھری نے سانحے پر گہرے دکھ اور رنج کا اظہار کرتے ہوئے کہا کہ معصوم بچوں کے جاں بحق ہونے کا واقعہ انتہائی دلخراش ہے۔ انہوں نے متاثرہ خاندانوں سے دلی تعزیت اور ہمدردی کا اظہار کرتے ہوئے کہا کہ حکومت غمزدہ والدین کے ساتھ برابر کے دکھ میں شریک ہے۔

انہوں نے اس بات پر زور دیا کہ ہسپتالوں سمیت تمام عوامی اور سرکاری اداروں میں مؤثر حفاظتی اور ہنگامی انتظامات کو یقینی بنانا ناگزیر ہے تاکہ مستقبل میں ایسے افسوسناک حادثات کی روک تھام کی جا سکے۔